PANGLIMBAK SESURATAN AKSARA BALI SAKING PENGAWIT NGANTOS MANGKIN

Pidabdab nglestariang miwah nglimbakang basa, aksara, miwah sastra Baline sampun saking riin kalaksanayang. Pidabdabe punika taler sampun sering kabligbagang ring pasamuhan miwah loka karya. Pemerintah Provinsi Bali taler sampun ngamedalang sepat siku-siku sane marupa Peraturan Daerah No. 03 Tahun 1992 tentang Bahasa, :  Aksara, dan Sastra Bali. Pidabdab nglimbakang basa, aksara, miwah sastra Baline nenten prasida kalaksanayang antuk pamrentah kewanten, i raga semeton Bali sareng sami taler mangda sareng ngremba parindikanne sakadi punika.

 

Ngupapira basa pamekas aksara Bali taler sampun saking nguni kalaksanayang. Pasang aksara Bali taler sampun sering kabligbagang, kaubah, miwah kasampurnayang. Sadurung Pasamuhan Agung Basa Bali tahun 1957 pasang aksara Baline ketah kabaos asang purwadresta. Ring pasange inucap nenten wenten pamargi sana sumanggem risajeroning nyurat aksara Bali. Duke punika (sadurung 1957) taler sampun medal buku sane mautsaha matetegar ngrumusang pasang aksara Bali miwah tata cara nyurat aksara Bali sakadi Balineesche Schriftaal (Nitisastro, 1918) dan Tjontoh Menoelis Hoeroef Bali (Gelgel, 1923). Sasampunika punika raris wong Welanda, Scwartz (1931) matetegar nawengin “kekacauan sistem penulisan” sajeroning pasang Purwadresta puniki malarapan antuk ngamedalang buku Oeger-oeger Aksara saha Pasang Sasoeratan Basa Bali Kapara. Utsaha Schwartz puniki nenten prasida nawengin wicarane puniki, sakewanten kawentenan buku inucap ngawinang pasang aksara Baline sayan ruet santukan makueh ngubah, nyaderanayang, miwah ngicalang pasang aksara Bali sadurungnyane. Wusan punika wau raris Pemerintah Daerah Bali ngwentenang Pasamuhan Agung Basa Bali tanggal 23 — 26 Oktober 1957 ring Denpasar. Asil utawi kaputusan Pasamuhan Agung punika taler nenten katerima becik olih para sujana Bali duk punika. Duaning asapunika kaputusan Pasamuhan Agung inucap kabligbagang tur kaparipurnayang malih ring Pasamuhan Agung Alit tanggal 28 — 30 Desember warsa 1963, taler kalaksanayang ring Denpasar.

 

Sasampune kawentenang pasamuhan sakadi ring ajeng raris metu makudang-kudang buku-buku penuntun pasang aksara sang kaanutang ring hasil kaputusan pasamuhan, luire Ejaan Bahasa Bali dengan Huruf Bali dan Huruf Latin (Ranuh dan Sukrata, 1957), Pasang Aksara Bali (Simpen AB, 1973), dan Pedoman Perobahan Ejaan Bahasa Bali dengan Huruf Latin dan Huruf Bali (Tinggen 1979). Makudang-kudang utsaha nitenin pasang aksara Bali terus kalaksanayang mangda pasang aksara Baline prasida nganutin aab jagat tur nganutin tata aksara sapatutnyane. Kaping untat raris kawentenang Loka Karya olih Dinas Kebudayaan Provinsi Bali sang maosang indik pasang aksara Bali tanggal 24 Desember 1997 ring Denpasar. Saking loka karya punika medal raris pedoman tata cara nyurat aksara Bali inggih punika Pedoman Pasang Aksara Bali (1998). Pedoman Pasang Aksara Baling puniki yening rereh unteng dagingnyane nenten banget pabinayannyane ring kaputusan Pasamuhan Agung 1957 miwah 1963 sakewanten wenten paweweh pamekas ring pangrauh basa tiosan miwah negesang sarwi ngwatesin uger sadurungnyane sane nenten anut ring aab jagat kadi mangkin.

 

Kawentenan jagat sakadi mangkin sane ketah kabaos jagat global wiakti ngwetuang aor ring sajeroning basa sane wenten ring jagate. Indike sakadi puniki taler nibenin basa Baling pamekas ri kala nyurat nganggen aksara Bali. Malarapan kawentenane sakadi puniki Dasar sesuratan aksara Baline ring ruang publik patut taler titenin mangda anut ring tata titi pasang sastra. 

Kaketus saking 

Kryapatra pesamuan alit Bahasa Bali 

27-28 Agusstus 2019

Olih Drs. I Gde Nala Antara, M.Hum